तू असतीस तर झाले असते
सखे उन्हाचे गोड चांदणे
मोहरले असते मौनातून
एक दिवाणे नवथर गाणे
बकुळीच्या फुलापरी नाजुक
फुलले असते गंधाने क्षण
आणि रंगांनी केले असते
क्षितीजावरील खिन्न रितेपण
पसरली असती छायांनी
चरणतली मृगशामल मखमल
आणि शुक्रांनी केले असते
स्वागत अपुले हसून मिश्किल
तू असतीस तर झाले असते
आहे त्याहून हे जग सुंदर
चांदण्यात विरघळले असते
गगन धरेतील धुसर अंतर
:मंगेश पाडगावकर
टिप्पण्या
टिप्पणी पोस्ट करा